सन 2023 च्या खरीप हंगामातील कापूस आणि सोयाबीन उत्पादक शेतकऱ्यांसाठी 4,194.68 कोटी रुपयांचे अर्थसहाय्य मंजूर झाले आहे. कृषिमंत्री धनंजय मुंडे यांनी महाआयटी आणि महसूल विभागाच्या सहकार्याने तांत्रिक अडचणी त्वरित सोडवून, शेतकऱ्यांना 10 सप्टेंबरपासून हे अर्थसहाय्य थेट खात्यात वितरित करण्याचे निर्देश दिले आहेत.
कृषिमंत्री धनंजय मुंडे यांनी सांगितले की, सन 2023 च्या खरीप हंगामातील कापूस व सोयाबीन उत्पादक शेतकऱ्यांना 0.2 हेक्टरपेक्षा कमी क्षेत्रासाठी 1,000 रुपये आणि 0.2 हेक्टरपेक्षा जास्त क्षेत्रासाठी प्रति हेक्टर 5,000 रुपये (दोन हेक्टरच्या मर्यादेत) सरसकट मंजूर करण्यात आले आहेत. यामध्ये कापूस उत्पादक शेतकऱ्यांसाठी 1,548.34 कोटी रुपये आणि सोयाबीन उत्पादक शेतकऱ्यांसाठी 2,646.34 कोटी रुपये असे एकूण 4,194.68 कोटी रुपये अर्थसहाय्य मंजूर झाले आहे. यासंबंधीची कार्यपद्धती शासनाने 30 ऑगस्ट 2024 रोजी जाहीर केली आहे.